بقلم : د/ رنا أحمد درويش
من كتر الكلام الكتير عن التعافي و الوعي النفسي المنتشر بقي فيه هوس بالتعافي ! كله عاوز في أسرع وقت يبقي بلا ألم ، كله عاوز ينام ويصحى يبقي متعافي من أي جراح أو صدمات نفسية ، و ده في حد ذاته بيسبب ألم إضافي فوق الألم الأساسي ..
المشكلة دايماً في إدراك الناس لمفهوم عميق جدًا زي التعافي ،، و اللي للاسف ساعات بيتفهم إنه مجرد تجاوز سطحي لمشاعر سلبية .. فانا متعافي يعني " انا مبقتش متضايق أو محبط " مع أن التعافي الحقيقي هو أوسع من مجرد تغيير حالة شعورية ..
مثلًا لو في عسكري خسر رجله في حرب ، مهما عمل من محاولات طبية حديثة لاستعادة رجله مش حيقدر . نفس الفكرة مع إنسان إتصاب جامد نفسيًا ،، عمليا مش حيقدر يرجع نفسه زي قبل الاصابة فخلاص الكلمة اللي جرحته سمعها ، الموقف اللي أذاه حصل ، الواقع اللي مكانش مصدقه شافه بعينه ..
خلاص الماضي مش هيتغير ! وهم إنه هيرجع زي ما كان قبل الإصابة ده مستحيل ، بس يقدر يتعايش مع الإصابة ،، يتعايش مع الاعاقة بتقبل و قوة ..
في النهاية ، التعافي مش زي ما سوشيال ميديا بتصوره ، القصص الخارقة عن ناس خرافية تجاوزت كوارث نفسية و عايشة حياتها كأن مفيش حاجة حصلت و إنتوا اللي خايبين إنكم مش جامدين زيهم ! ...
لا ده ساعات التعافي الحقيقي أن الانسان مش قادر يتعافي !! مش قادر يبقي زي الفل !! و بالرغم من كدة عنده صدق حقيقي تجاه نفسه إنه يستحق حياة افضل ، بالرغم من الاعاقة و الجرح العميق هيكمل و هيعيش حياته و يحقق أحلامه .. فالتعافي الحقيقي بيبدأ لما الشخص بيتحرر من هوس الرجوع لحالته الاولي و يسخر كل طاقته و إمكانياته لصناعة حالة جديدة .. حالة أكثر نضجاً و صلابة ..
التعافي مش مجرد محو للماضي ، إنما التعلم التعايش مع وجوده
إرسال تعليق