كتب / عمر السمالوسي
"إزاي أحب نفسي وأثق فيها واتجاهل كلام الناس وانتقادهم لشكلي ولجسمي؟"
الإجابة:
كل حد فينا عنده صورة عن نفسه اتكونت من عوامل كتيرة أوي، منها الكلام اللي سمعناه عن نفسنا من ناس مهمين عندنا زي الأب والأم والاخوات، ومنها كمان الأحداث اللي حصلت لنا، وخبرات النجاح والفشل اللى مرينا بيها..
أحيانًا الصورة اللى اتكونت عن نفسنا بتكون صورة سلبية فنشعر إننا مش بنحب نفسنا أو نثق فيها، عشان كده بنحتاج نعيد فحص الصورة الذاتية الحالية ونصححها ونضيف عليها ونكوّن صورة عن نفسنا إيجابية وواقعية، بمعنى إننا بنراجع المعلومات اللي نعرفها عن نفسنا أو نجاوب سؤال أنا مين؟
فمطلوب مني إني أكتب لستة بكل المعلومات عن نفسي، الإيجابية والسلبية، عن صفاتي واهتماماتي وأهم ما يميزني، وكمان أكتب إيه المشاعر اللي بحس بيها تجاه نفسي، مثلًا مبسوطة مني أو مكسوفة مني أو قلقانة مني.. وهكذا، وكمان نكتب الأفكار اللي في ذهني عن نفسي، يعني بفكر في نفسي إزاي وبقول لنفسي ايه.
الهدف إني اساعد نفسي على تكوين صورة ذاتية جديدة تكون واقعية وحقيقية فيها معرفة بنفسي وتمييز بين النقط القوية عندي ونقط الضعف ووقتها هقدر أفرح واحتفل بنقاط قوتي وانميها، وكمان اشوف نقاط ضعفي واشتغل عليها أو أطورها على قدر ما أقدر.
في جوانب في شخصيتنا نقدر نشتغل عليها ونطورها، وفي جوانب هنقبلها كما هي لأنها مش ممكن تتغير، فمثلًا إذا عندي أحداث قديمة مزعجة مقدرش ارجع بالزمن وأغيرها لكن أقدر مثلًا أغير من سلوكي وطريقة تفكيري فيها.. وهكذا.
مهم كمان أعرف إمكانياتي واطورها واتعلم مهارات جديدة، وده بيساعدني أثق في نفسي واعرف أنا قوية في إيه و ضعيفة في إيه واستمر في تطوير نفسي، ممكن بالقراءة والمعرفة أو بحضور كورسات مهمة بالنسبالي وممكن اتعلم اعمل علاقات صحية إزاي، أو اهتم بتطوير نفسي في مجالات تهمني.
مهم كمان إني أكلم نفسي كلام إيجابي مشجع، وفي نفس الوقت يكون كلام حقيقي وواقعي مبني على حقائق مش مجرد كلام، ده بيساعدني أحب نفسي، خصوصًا لما أوقف إني أقول لنفسي طول الوقت كلام سلبي فقط.
كدة أكون ببني علاقة إيجابية مع نفسي، أعرفني أكتر وأطور شخصيتي بشكل مستمر، لما بيكون عندي علاقة حلوة بنفسي ساعتها أقدر أكون مش بتأثر بكلام الناس وانتقادهم بشكل كبير، الفكرة مش تجاهل كلامهم لكن إني يكون أنا عندي كلام بيني وبين نفسي، أكون أنا عارفه نفسي وشغالة عليها وبالتالي حتى إذا الناس انتقدوني هيكون عندي صوت تاني جوايا بيتكلم بواقعية عن نفسي.
محتاجة كمان -يا عزيزتي- تبعدي عن الناس السلبيين الناقدين بقدر ما تقدري وتقربي أكثر من ناس إيجابية، فكري نفسك إن كلامهم وآرائهم تخصهم وخارجة من أفكارهم ونظرتهم مش بالضرورة تكون حقيقية.
أخيرًا، انتي مش مجرد جسم وشكل، انتي مش عروسة حلاوة، انتي بني آدم متكامل وأكتر من مجرد جسم وشكل، وبالتالي عندك جوانب تانية كتيرة في شخصيتك، مفيش مانع تهتمي بجمال شكلك وجسمك لكن اعملى ده عشانك انتي مش عشان الناس، مهم تكوني مرتاحة مع شكلك وجسمك وبرضه في حاجات هتغيريها وحاجات تاني اقبليها لأنها مش هتتغير، يعنى مثلًا أقدر آكل بشكل صحي والعب رياضة عشان جسمي يكون سليم وجميل لكن مش هقدر أغيّر إني قصيرة مثلًا أقدر أهتم إن شعري يكون نظيف ومنظم لكن مش هقدر أعمل عنيا زرقاء، أقدر استخدم كريمات لبشرتي فتكون بصحة لكن مقدرش أغير لونها وهكذا..
ومهم أوي إنك لا تمارسي أي مقارنة بينك وبين أي حد تاني لأن ده فيه ظلم شديد، لأن كل شخص مختلف ومميز ومتفرّد.
تابعوا اجاباتنا على اسئلتكم من خلال هاشتاج #اسألي_نون، ولو عندكم أي اسئلة تقدروا تبعتوهالنا وأطباء نفسيين متخصصين هيجاوبوا عليها، اللينك في أول تعليق.
أجابت على السؤال:
الأخصائية النفسية: نجوى سامي، مدير شريك قطاع التدريب برنامج الحرية، حاصلة على ماجستير الأدب وعلم النفس، وحاصلة على الترخيص الدولي لمعالج الادمان.
إرسال تعليق