كتبت / چيهان سالم
بعيدا عن الهزار اللى كنا بنقوله واننا مش هنجيب حاجة وان الحمد لله الحاجة كلها عالعريس ومفيش قايمة
لكن حقيقة بقى
قائمة ايه اللى بتفكروا فيها وسفرة ايه وانتريه واوضة نوم
يساوا ايه دول وانت مع راجل لا بيقدرك ولا بيحترمك
ولا عمره كان سند ولا ضهر ليكى ولا لولادك ومنيمك دائما دموعك على خدك وهو سبب قهرك
يساوى ايه وانت مع راجل وانت معاه مش حاسة بأمان
هتنفعك القائمة
هينفعك الجهاز والصالون والانتريه الغالى واوضة النوم اللى محصلتش
دول ولا حاجة
طب علفكرة بقى ودى حقيقة لما جوزى اتقدملى كان متفق على حاجات مع بابا الله يرحمه وقبل الجواز بابا شاف أن شقتى كبيرة وان فى أوضة هتكون فاضية
ولقى جوزى راجل ويستاهل من نفسه راح جابلى انتريه تانى
وانا جوزى الحمد لله مضى على القائمة من غير ما حتى يقرى فيها ايه
اقول حاجة كمان انا من يوم ما اتجوزت ويعلم ربنا انا معرفش قايمتى فين
وتقريبا مش فاضل فى شقتى من كل جهاز غير اوضة نومى والحمد لله انا غيرت كل العفش حتى الشقة كمان بفضل الله وبتعب جوزى
الاساس يا جماعة انكم ترتبطوا باللى يصونكم ويحافظ عليكم ويوم ما تقعى ولا بعد الشر يجرالك حاجة يكون هو سندك وضهرك اللى فعلا تتدارى فيه ويكون هو ابوكى واخوكى وصاحبك فعلا
اللى معاه تحسى انك احسن واحدة فى الدنيا
وأغنى واحدة واغلى واحدة
اللى يساعدك تعلى ما يكسركيش
اللى لو اختلفتم مع بعض فعلا ما تجوش على بعض
اللى لو رجع بيكى الزمان تقولى هو ده ومتختاريش غيره
حقيقى هو ده الامان وهو ده الستر من الزمان
اتجوزى اللى يحطك على رأسه ويخليكى ملكة مش اللى معاه تحسى انك خادمة
الفلوس مش بتامن مستقبل الأمان فى الموده والرحمة
مش قائمة وعفش دول ولا حاجة
ممكن جدا بكتبلك قائمة بمبلغ واو
ويجيب عزال مالهوش مثيل. وشهر واحد وتقوليله ادفع عمري كله وتطلقنى وتبيعى القائمة والعفش ولو طلب كمان منك فلوس هتدفعى علشان تنقذى نفسك
اختاروا الراجل يا جماعة وحطوا تحتها الف خط
هو ده الامان
ربنا يرزق كل البنات باللى يطيب خاطرهم وميكسرهاش
إرسال تعليق